Bhagavad Gita: Chapter 4, Verse 40

అజ్ఞశ్చాశ్రద్ధధానశ్చ సంశయాత్మా వినశ్యతి ।
నాయం లోకోఽస్తి న పరో న సుఖం సంశయాత్మనః ।। 40 ।।

అజ్ఞ — అజ్ఞానులు; చ — మరియు; అశ్రద్ధధానః — శ్రద్ద/విశ్వాసం లేని వారు; సంశయ ఆత్మా — సంశయము కలవాడు; వినశ్యతి — పతనమగును; న — కాదు; అయం — ఈ యొక్క; లోకః — లోకము; అస్తి — ఉండును; న — లేదు; సుఖం — సుఖసంతోషాలు; సంశయ-ఆత్మనః — సంశయాత్మునకు (అనుమానం కలవానికి).

Translation

BG 4.40: జ్ఞానము, విశ్వాసము రెండూ లేని వారు మరియు అనుమానం పడే స్వభావం కలవారు, పతనమైపోతారు. విశ్వాసములేక, సందేహించే వారికి ఈ లోకంలో ఇంకా పర లోకంలో కూడా సుఖం ఉండదు.

Commentary

'భక్తి రసామృత సింధు' - సాధకులను వారి విశ్వాసం మరియు జ్ఞాన స్థాయిలను బట్టి మూడు రకాలుగా వర్గీకరించింది.

శాస్త్రే యుక్తౌ చ నిపుణః సర్వథా దృఢ-నిశ్చయః
ప్రౌఢ-శ్రద్ధో ఽధికారీ యః స భక్తావుత్తమో మతః
యః శాస్త్రాదిష్వనిపుణః శ్రద్ధావాన్ స తు మధ్యమః
యో భవేత్ కోమల శ్రద్ధాః స కనిష్ఠో నిగద్యతే (1.2.17-19)

"శాస్త్ర పరిజ్ఞానం కలిగి ఉండి మరియు ధృడ విశ్వాసం కలిగినవాడు అత్యున్నత సాధకుడు. శాస్త్ర పరిజ్ఞానం లేకపోయినా గురువు మరియు భగవంతుని పై విశ్వాసం/నమ్మకం ఉన్నవాడు మధ్యమ స్థాయి సాధకుడు. శాస్త్ర పరిజ్ఞానం లేకుండా మరియు విశ్వాసం కూడా లేనివాడు నిమ్న స్థాయి సాధకుడు." శ్రీ కృష్ణుడు, ఈ మూడవ రకం వారు ఈ జన్మలో గాని లేదా ఆ పై జన్మలలో గాని సుఖము పొందలేరు అని వివరిస్తున్నాడు.

ప్రాపంచిక కార్యకలాపాలకు కూడా నమ్మకం అవసరం. ఉదాహరణకి, ఒక మహిళ హోటల్ కి వెళ్లి, భోజనం ఆర్డర్ చేసింది అనుకుందాం, ఆమెకి ఆ హోటల్ వాళ్ళు ఆమె ఆహారంలో విషం కలపరు అన్న నమ్మకం ఉందన్నమాట. కానీ ఒకవేళ, ఆమెకి అన్నీ అనుమానాలే ఉండి, అన్నీ ఆహార పదార్ధాలని మొదట రసాయన పరీక్ష చేయదలిస్తే , ఆమె తన భోజనాన్ని ఆస్వాదించేదెప్పుడు? దానిని భుజించేదెప్పుడు?

అదే విధంగా, ఒక వ్యక్తి గడ్డం గీసుకోవటానికి క్షురకుని కొట్టుకి వెళ్లి, అక్కడ కుర్చీలో కూర్చున్నాడనుకోండి. క్షురకుడు తన పదునైన కత్తిని ఆయన మెడ మీద తిప్పుతాడు. ఇప్పుడు ఆ వ్యక్తి క్షురకుని పై, తనను హత్య చేస్తాడేమో అన్న అనుమానం ఉంటే, క్షురకుడు గడ్డం గీయటానికి ఆ వ్యక్తి కుర్చీలో నిలకడ గా కూర్చోలేడు. కాబట్టి, అనుమానపు వ్యక్తులకు ఈ లోకంలో గాని పర లోకం లో గాని సుఖం లేదు అని శ్రీ కృష్ణుడు అంటున్నాడు.